Биыл Ескелді ауданында қант қызылшасын 1400 гектар жерге себуді межелеп отыр

Ауыл шаруашылығында жалпы өнім көлемі 18 млрд. 565 млн. теңгені құрады. Ауыл шаруашылығы алқаптарының көлемі 49,9 мың га. Қант қызылшасының жиналған өнім көлемі 37 мың 500 тонна болды. Әр гектарынан орта есеппен 385,6 центнерден айналды. Баяндамашының айтуынша, қант қызылшасын 1400 гектар жерге себуді межелеп отыр.

Сонымен қатар ауданға инвестиция тартуға да көп көңіл бөлінуде. Мәселен, 2015 жылы 3 млрд. 205 млн. теңге инвестиция тартылса, биылғы жылы 539,4 млн. теңгеге жеткізілмек. Сонымен биылғы жылы ауданда шағын және орта бизнестің 15 нысаны ашылып, 37 жаңа жұмыс орны ашылды. Мұнан соң Н. Қылышбаев тұрғын үй құрылысы, жаңа өндіріс орындарын ашу, ет экспорты туралы мәселелерге тоқталды.

Өз кезегінде баяндамашының сөзінен кейін өңір басшысы әкімнің бірқатар жұмыстарына, атап айтқанда ауданда бір де бір жылыжайдың болмауы, өнеркәсіп алаңдарының құрылмауы, Индустрияландыру картасына енгізетін бір де бір жобаның ұсынылмауына байланысты сын айтты.

«Ескелді ауданы – Талдықорған қаласына ең жақын орналасқан аудандарың бірі. Бұл аудан қаланы қажетті азық-түлікпен, көкөніспен, етпен, сүтпен толық қамтамасыз етуі керек. Осыған басты назар аудару қажет. Жалпы бір жылда атқарылған жұмыс ауқымды, жақсы нәтижелер де бар, бірақ барлық бағыттарды қатар алып жүріп, белсене жұмыс істеу керек», - деді А. Баталов.