ОҚО-да ирандық инвесторлар қуаттылығы 5 мың тоннаны құрайтын ет комбинатын салмақ
2 Ақпан, 2016 12:51
ОҚО әкімдігінде өңір басшысы Иран Ислам Республикасынан келген инвесторлармен кездесті, деп хабарлады ОҚО әкімдігінің баспасөз қызметі.
Кездесуде тараптар Бәйдібек ауданында жылдық қуаттылығы 5 мың тоннаны құрайтын ірі қараға арналған мал сою цехының құрылысын талқылады. Ет комбинаты болашақта етті мұздатып, ауасыз қалташада шығаруды жоспарлап отыр.
Жалпы құны 6 300 000 мың теңгені құрайтын жобаны әзірлеу мен жүзеге асыру жұмыстары 2016 жылдың қаңтар-қыркүйек айына жоспарланған. Айта кетейік, құны 573 866 мың болатын құрылғыларды инвесторлар отандық компаниядан сатып алмақ. Нысанның құрылысы біткен соң мұнда 196 жұмыс орны ашылады деп күтілуде.
Шығарылған өнімдер Қазақстанның ішкі нарығында саудаланып, Иран мен Біріккен Араб Әмірлігіне экспортталатын болады. Сонымен қатар, тараптар, жиын барысында ауыл шаруашылығы саласында өзара ынтымақтастыққа уағдаласты.
