ШҚО-да «Нұр Отан» партиясының облыстық сайлауалды штабы құрылды

1 Ақпан, 2016 17:31

Шығыс Қазақстан облысында «Нұр Отан»партиясы облыстық филиалының сайлауалды штабы құрылды, депхабарлайды ШҚО ақпарат орталығы.

«Облыстық штабтың құрамы бекітіліп,жұмыс жүргізуге дайын. Бүгінгі таңда еліміздің барлық аймақтарында 20 ақпанғадейінгі партияның сайлауалды штабтары дайындық жұмыстарын жүргізіп жатыр», депатап өтті «Нұр Отан» партиясының ШҚО төрағасының бірінші орынбасары Әнуарбек Мұхтарханов. Оның айтуынша, Шығыс Қазақстан облыстық сайлауалды штабының басты міндеті – сайлау кезінде сайлау заңнамасын сақтау, сайлаудың әділ және ашық өтуін қамтамасыз ету.

Облыстық сайлауалды штабының құрамына аймақтың белсенділері,партияның облыстық филиалының саяси кеңес мүшелері, қоғамдық бірлестік төрағалары, мемлекеттік емес ұйымдардың және облыстық қоғамдастық өкілдері қатысады. Сонымен қатар, облыстық штаб құрамына белсенді жастардың өкілдері де кіріп отыр.

Атап өтетін жайт, аймақта 20 облыстық және қалалық қоғамдық штаб қабылдауларының ашылуы жоспарланып отыр. Бұл құрамда 450 азамат қамтылады.