Еуропалық ірі компания Қазақстанның ет саласына 100 млн. доллар инвестициялайды (ФОТО)

18 Қаңтар, 2016 11:03

Ақтөбе облысында аймақаралық сиыр еті кооперацияларын құру мен дамыту мәселелері бойынша мәжіліс өтті.

Оған Облыс әкімі Бердібек Сапарбаев, ҚР Ауыл шаруашылық министрі Асылжан Мамытбеков, БҚО әкімі Нұрлан Ноғаев, Қостанай облысының әкімі Архимед Мұхамбетов, еуропалық Inalca Eurasia Holdings GesmbH компаниясының өкілдері және бірқатар инвесторлар мен облыстың ауыл шаруашылық тауарын өндірушілері қатысты.

Әкімдіктің хабарлауынша, Бердібек Сапарбаев жүзеге асып жатқан жобалар мен облыстың агроөнеркәсіп кешенінің жағдай туралы айтты. Облыста 2015 жылы «Сыбаға» бағдарламасы бойынша 4,5 мың мүйізді ірі-қара сатылып алынған. Ірі-қараның тұқымын жақсарту үшін 44 пайыздан артық аналық тартылған. Ресей Федерациясына 2,8 мың тонна ет және ет өнімдері экспортталған. Соның ішінде 895,5 тонна сиыр еті.Облыстың ауыл шаруашылық саласына тартылған инвестиция көлемі 5,3 млрд. теңгені құраған.

Ауыл шаруашылық министрі Асылжан Мамытбеков Ұлт жоспары «100 нақты қадамның» 61-ші қадамын іске асыру мақсатында Үкімет ет өңдеу мен өндірісті дамыту үшін стратегиялық инвесторларды тарту жұмыстарын жүргізіп жатыр, деп атап өтті. Сонымен қатар, ол «Inalka Eurazia» компаниясы республикамыздың ет саласын 100 млн. доллардан астам қаржымен инвестициялау туралы шешім қабылдағанын атап өтті.

Мәжілістің қорытындысы бойынша аймақаралық етті сиыр кооперациясын дамыту мәселесі бойынша жергілікті жоспар бекітілді.