Т.Дүйсенова және А.Сомма ЭЫДҰ елдік бағдарламасын іске асыру бойынша ынтымақтастықты жандандыру жөнінде келісті
18 Қаңтар, 2016 09:58
Экономикалық ынтымақтастық және даму ұйымына (бұдан әрі - ЭЫДҰ) қатысушы елдердің жұмыспен қамту, еңбек және әлеуметтік қамсыздандыру министрлерінің Парижде өткен кездесуі шеңберінде өткен екі жақты келісімнің нәтижесінде ҚР Денсаулық сақтау және әлеуметік даму министрі Тамара Дүйсенова және ЭЫДҰ Бәсекелестік жөніндегі еуразиялық бағдарламаның басшысы Антонио Сомма ЭЫДҰ Еуразиялық бағдарламаны жүзеге асыру және оның аясында орындалатын үш шолу бойынша ынтымақтастықты жандандыру жөнінде келісті.
Бұрын хабарланғандай, ЭЫДҰ өкілдерімен кездесу барысында Тамара Дүйсенова «Үш топқа: жастарға, қарт қызметкерлерге және халықтың осал топтарын қорғауға бағытталған саясатты шолу», «Қазақстан үшін ЭЫДҰ денсаулық сақтау жүйесін шолу» және «Қазақстан үшін ЭЫДҰ Ұлттық денсаулық сақтау шоттарын шолу» жобаларын әрі қарай іске асыру мәселелерін талқылаған болатын.
Естеріңізге саламыз, Парижде өтіп жатқан жұмыспен қамту, еңбек және әлеуметтік қамсыздандыру министрлерінің кездесуінде әлемнің 42 елінің өкілдері қатысуда.
