Мәжілістің мерзімінен бұрын сайлауы елдегі реформаларды жүзеге асыруды жеделдетеді

«Қазақстан ғалымдары қазіргі таңда 5 институттық реформаны және дағдарысқа қарсы кешенді шараларын жүзеге асырудың айрықша маңыздылығын атап өтеді.

Біріншіден, еліміз бүгінде дамудың мүлдем жаңа сапалық деңгейіне аяқ басты. Бес институттық реформа «Қазақстан 2050» стратегиясының басты межесі – әлемдегі ең дамыған 30 елдің қатарына қосылуымызға тың серпін береді. Сондықтан, Ұлт Жоспарын табысты іске асыру үшін халықтың жаңа сенім мандатына ие болған президенттік реформалар Парламенті және жергілікті маслихаттар қажет.

Екіншіден, әлемдік дағдарыстың аса қуатты кезекті легі келе жатыр. Осыған байланысты дағдарысқа қарсы шаралардың стратегиясы қабылданды. Бұл шаралардың мұқият жүзеге асырылуы еліміздің Өсімін, Реформалары мен Дамуын қамтамасыз етеді. Жаңа Парламент пен барлық деңгейдегі мәслихаттар дағдарысқа қарсы стратегияның жүзеге асырылуын заңнамалық қамтамасыз етуі тиіс.

Үшіншіден, сайлау мерзімін бір жылға созбай мерзімінен бұрын өткізу халықтың сайлау науқанына алаңдамай, елдік істерге жұмылуына, әрі қазіргі таңда әрбір тиыны маңызды бюджет қаражатын үнемдеуге мүмкіндік береді.

Осы пайымдардың негізінде Ұлттық Ғылым Академиясы Парламент депутаттарының ұстанымдарын құптай  отырып, барша қазақстандықтарды халық қалаулыларының бастамасын қолдауға үндейді», - делінген  Қазақстан Республикасы Ұлттық ғылым академиясының үндеуінде.