Б.Сағынтаев: Қазақстанда экономика дамуының жаңа сценарийі әзірленеді

15 Қаңтар, 2016 13:18

Мұнай бағасының құлдырауы жағдайындағы экономика дамуының сценариі мен мемлекеттік бюджетті оңтайландыру 19 қаңтарда өтетін Экономикалық саясат жөніндегі кеңес отырысында жете қаралады, деп мәлімдеді ҚР Премьер-Министрінің бірінші орынбасары Бақытжан Сағынтаев бүгін ОКҚ брифингінде.

«Мұнай бағасының қарқынды құлдырауы мен әлемдік нарықтағы келеңсіздіктерді ескере келе, Мемлекет басшысы Үкіметке мұнайдың әлемдік бағасы барреліне 20 долларға құлдыраған жағдайда да Қазақстан экономикасын дамытудың мүмкін сценариін әзірлеуді тапсырды. Осынау сценарийлік болжамдар сейсенбі, 19 қаңтар күні Үкімет жанындағы Экономикалық саясат жөніндегі кеңес отырысында қаралады. Бюджет бойынша қатаң шешімдер қабылдауға тура келуі де мүмкін. Шығыстарға тексеру жүргізіліп, қаржыландырудың тиімсіз бағыттары айқындалады», - деді Б.Сағынтаев.

Осы ретте вице-премьер «Нұрлы жол» мемлекеттік бағдарламасы мен әлеуметтік сала шығыстары сақталатынын баса айтып өтті.

Ол сондай-ақ 2016 жылы дағдарысқа қарсы шараларды жүзеге асыруға 225,5 млрд теңге көлемінде арнайы резерв бөлінгенін еске салды. Аталған қаражат бірінші кезекте жұмыспен қамту іс-шараларын қамтамасыз етуге және «Нұрлы жол» мемлекеттік бағдарламасының жобаларына бағытталады.

Барлық жаңалықтар