Н.Жазылбеков: Парламент Мәжілісі қабылдаған заң жобалары өзінің нәтижесін көрсетеді
«Бүгін Мемлекет басшысына мерзімінен бұрын сайлау өткізу туралы ұсыныс жасадық. Бұл дұрыс шешім деп ойлаймын. Қазірде әлемдік дағдарыс біздің еліміздің экономикасына да ықпал етіп жатыр. Дүниежүзіндегі дағдарыс кезінде Елбасының Ұлт жоспарын іске асыруға байланысты Парламент 59 заң қабылданды. Осы заңдардың бәрін орындап, олар қоғамның игілігіне жұмыс істеуі үшін Парламенттегі үш фракция осындай ұсыныс берді», - дейді депутат.
Оның пайымдауынша, Мәжіліс сайлауы жергілікті мәслихаттардың сайлауымен бірге өтуі керек. Осылайша, жаңа Парламент пен мәслихаттар Елбасының реформаларын жүзеге асыруға атсалысуы тиіс.
«Бүгінде жергілікті атқару органдарына байланысты үлкен заңдар қабылданған. Мәслихаттарға, жергілікті әкімшіліктерге үлкен жағдай жасалып отыр. Бүгінгі күні олардың өз бюджеті бар. Реформалардың көбі жергілікті атқару органдарының жұмысына қатысты. Сондықтан жаңа Парламент, жаңа мәслихаттар Елбасының тапсырмасын, реформаларды жүзеге асырып, қоғамға, халыққа қызмет етуі қажет. Жалпы, бұл реформалар тек Парламент пен Үкіметтің жұмысы ғана емес, бүкіл қоғам, ел болып қойылып отырған мақсат-міндеттерді бірге атқаруымыз керек. Сонда ғана біз зор нәтижеге қол жеткіземіз», - деген Нұрлан Жазылбеков Парламенттің осы жылдары атқарған жұмысына бағаны қоғам беретінін тілге тиек етті.
«Біздің жұмысымызға бағаны қоғам береді. Сайлауға қанша партия қатысатынын білмейміз. Қазақстандықтар қоғамға жұмыс істеп жатқан партиялардың таңдайды деген ойдамыз. Жалпы, осы жылдары үш фракция да жаман жұмыс атқарған жоқ. Парламенттің жұмысына Елбасы да үлкен баға беріп отыр», - деп түйіндеді сөзін депутат.
