Ұлт жоспары: ШҚО-да жергілікті полиция қызметі құрылды
Дулат Қазақпаев 1962 жылы ШҚО Жарма ауданында дүниеге келген.Ішкі істер органдары жүйесінде 1983 жылдан бастап жұмыс істейді. 1996 жылдан 2013 жыл аралығында Бесқарағай ауданы ІІБ бастығының орынбасары, ШҚО ІІД Әкімшілік полициясы басқармасы бастығының орынбасары лауазымдарында қызмет атқарған. 2013 жылдан бастап ШҚО жергілікті полиция қызметі басшысы лауазымына тағайындалғанға дейін ШҚО Аягөз ауданы ішкі істер бөлімі бастығы болған.
Жаңа құқық қорғау құрылымының түрлі полиция бөлімшелерінде қызмет ететін қызметкерлерден құрылатынын атап өту қажет. Аталған қызметке келесі міндеттер жүктелген: құқық бұзушылықтардың алдын алуды жүзеге асыру, қоғамдық тәртіпті күзету, жол жүру қауіпсіздігін қамтамасыз ету, қылмыстық құқық бұзушылықтарды ескерту және жолын кесу, қылмыстық істер бойынша хаттамалық нысанда сотқа дейінгі тергеп-тексеру. Сонымен қатар, ішкі істер органдарының тұтастығы және қызметкерлердің құқықтық мәртебесі сақталатын болады.
Жергілікті полиция қызметі құрамына учаскелік полиция инспекторлары мен олардың көмекшілері, кәмелетке толмағандар ісі жөніндегі инспекторлар және «мектеп инспекторлары», табиғатты қорғау полиция бөлімшелері қызметкерлері, қабылдау-бөлу және арнаулы қабылдау органдары, жол-патрульдік полициясы, сондай-ақ әйелдерді зорлық-зомбылықтан қорғау жөніндегі бөлімшелерінің қызметкерлері енеді. Жергілікті полиция құрамындағы бөлімшелерді қаржыландыру және материалдық-техникалық жабдықтандыру бұрын жергілікті бюджеттен қамтамасыз етілгендіктен, жергілікті атқарушы органдарға қосымша қаржылық жүктеме әкелмейді.
