ОҚО-ның сот залдары аудиобейнебайқау құралдарымен жабдықталуда

9 Қаңтар, 2016 13:02

Жыл басында Елбасы Н.Назарбаев Бес институционалдық реформаны жүзеге асыру бойынша «100 нақты қадам» – Ұлт жоспарын орындаудың практикалық кезеңі басталғанын айтты. Және мемлекетті, экономика мен қоғамды дамыту үшін жаңа құқықтық орта қалыптастыратын 59 заң күшіне енгенін де хабарлады, деп хабарлады облыс әкімдігі.

ОҚО Аймақтық коммуникациялар қызметінде өткен брифингте облыс сотының төрағасы Н.Шәріпов Ұлт жоспарында «Заң үстемдігін қамтамасыз ету» реформасында сот жүйесіне қатысты 11 мақсатты қадамның көрсетілгенін айтып, аймақтағы іске асыру жұмыстарынан мысал келтірді.

«100 нақты қадамның 20-қадамында көрсетілген міндеттерге қатысты, сот жүйесінде бірқатар жұмыстар іске асырылды. Мәселен, бүгінгі таңда Жоғарғы Соттың жанындағы департамент тарапынан барлық сот процестеріне аудиобейнетіркеу (АБТ) жүйесін енгізу бойынша тиісті жұмыстар жүргізілді. Былтыр ОҚО бойынша 33 сот залы АБТ жүйесімен жарақтандырылған болса, биыл жыл басында олардың саны 46-ға жетті. Сот залдарындағы аудио және видеожазу жазбаларын тоқтатуға немесе редакциялауға мүмкіндік берілмейді. Бұл судьяларды және сот мәжілісіне қатысушыларды да тәртіпке шақырып, сот процесі мен сот қабылдаған шешімнің объективтілігін қамтамасыз етеді. Жалпы, облыста 102 сот залы бар», - деді сот төрағасы.

Мемлекет басшысы ұсынған Бес институционалдық реформаны жүзеге асыру бағытында медиа-жоспар бекітіліп, облыста жүйелі жұмыстар жүргізілді. Мәселен, өңірдегі 181 судья аудан, қалалардағы ірі кәсіпорындармен және мемлекеттік мекеме ұжымдарымен кездесіп, оларға 16-26-қадамдарда айтылған мәселелерді жан-жақты түсіндіріп, жергілікті әкімдермен бірлесіп елді мекендерді аралады. Осы бағытта облыс соттарының судьялары мен қызметкерлері тарапынан БАҚ-та 434 материал жарық көрген.

Барлық жаңалықтар