Ақтөбеде Қазақстан Тәуелсіздігінің 25 жылдығына орайластырылған жалпыұлттық жоба бастау алды

«Қоныс» спорт сарайында өткен шараға 4 мыңдай адам қатысқан. Бір сағаттық татрландырылған көріністер Қазақстанның тарихының барлық тұстарын қамтыды.

 «25 жылда талай өзгеріс болды. Қазақстан 70-тен астам халықаралық ұйымның белді мүшесі атанды. Елімізде көптеген ірі-ірі шаралар, саммиттер, форумдар өткізіледі. Осы уақытқа дейін елімізде жалпы ішкі өнім де, экономикаға тартылған инвестиция да 40 есе артты. 1993 жылмен салыстырғанда өндіріс көлемі 1000 есеге дейін жоғарылады. Халықтың өмір сүру жасы 72-ге дейін көтеріліп, бала туу көрсеткіші 68 пайызға өсті. Соңғы 5 жылдың ішінде ғана елімізде индустриалды даму бағдарламасы аясында 950 жаңа кәсіпорын құрылып, 250 мың жаңа жұмыс орны ашылды.», деді жиында облыс әкімі Бердібек Сапарбаев.

Аймақ басшысы сапарға шығатын үгіт пойызына ақ жол тілеп, оның бастамашысы «Нұр Отан» партиясының өкілдеріне Қазақстан халқы Ассамблеясының ақ туын тапсырып, шығарып салды.

«Үгіт пойызы қаңтар-ақпан айларында облыстың барлық аудандарын аралап шықпақ. Оның құрамында «Нұр Отан» партиясының, «Даму» кәсіпкерлікті дамыту қорының өкілдері медицина қызметкерлері, заңгерлер бар. Негізгі мақсат - облыс халқына 25 жылда жеткен жетістіктерді, атқарылып жатқан жұмыстарды насихаттау, тұрғындарға қажетті медициналық, заңгерлік көмектерін беру, ауылда шағын және орта бизнесті құру бойынша кеңестер ұсыну.Үгіт пойызын шығарып салғаннан кейін сарайдағы мереке әрі қарай жалғасты. Театрландырылған қойылымның шешуші бөлімінде осы тарихи датаға дейінгі «кері қарай есептеу» сәттері әдемі көрсетілді.

Тәуелсіздіктің ширек ғасырлық тойын тойлайтын жылда облыста барлығы 5 мыңнан астам әртүрлі шаралар өткізілмек. Ал Ақтөбеден бастау алған шара еліміздің басқа өңірлерінде де жалғасын табады.