ОҚО-да 2015 жылы 22 мың жұп отбасын құрған
8 Қаңтар, 2016 11:23
Оңтүстік Қазақстан облысында өткен жылы 22 мыңға жуық жұп заңды некеге тұрған. Ал 31 желтоқсан Жаңа жыл қарсаңында 41 жұп отбасын құрды, деп хабарлады облыс әкімдігі.
Облыстық АХАТ бөлімінің хабарлауынша, 2014 жылы 23 мыңнан астам жұп шаңырақ көтеріпті. Жас отбасылар некеге тұру үшін электронды түрде өтініш беру жүйесі де қызмет етеді. Бұл өз кезегінде жұмыстың тиімділігі мен уақыт үнемділігін арттырып отыр.
АХАТ бөлімдері отбасы мәртебесін арттыруға және отбасылық құндылықтарды нассихаттауға бағытталған жұмыстарды тұрақты жүргізеді.
АХАТ бөлімдері тоқсан сайын жастарға және некеге отыратын азаматтарға арналған «дөңгелек үстелдер» мен семинарлар өткізеді. Сондай-ақ, әр ауданда жас отбасы клубы жұмыс істейді. Онда дәрігерлер мен психолог мамандардың қатысуымен семинар-тренингтер, ауыл зиялыларымен бірлескен жиындар өткізіліп тұрады.
