Талдықорғанда Президент шыршасы өтті (ФОТО)

2 Қаңтар, 2016 12:19

Талдықорған қаласындағы «Жастар» Спорт сарайында Президент шыршасы өтті. Дәстүр бойынша оған оқу үздіктері, белсенді оқушылар, ата-анасының қамқорлығынсыз қалған бабалар, мүмкіндігі шектеулі және көп балалы отбасынан шыққан балалар, жалпы саны 200 оқушы қатысты, деп хабарлады Алматы облысы әкімдігі.

Театрландырылған көріністен кейін балаларды ел Президенті Нұрсұлтан Назарбаев бейнежазба арқылы құттықтады.

Мұнан соң оқушыларды облыс әкімі Амандық Баталов құттықтап, балалаға мықты денсаулық, қуаныш пен бақыт тіледі.

«Бүгін Сендермен бірге қаншама бала Елбасының тілегі мен батасын алып, жаңа 2016 жылды қарсы алады. Бұл – сендер үшін үлкен мақтаныш. Алдағы уақытта да жақсы оқып, тек жоғарыдан көрініп, бізді қуанта беріңдер. 2016 жыл жақсы табыстар мен жаңа істердің бастауы болсын!» – деді облыс басшысы А. Баталов.

Театрландырылған көрініс барысында Амандық Ғаббасұлы Аяз Атамен бірге шыршаның жарығын жағып, балаларға сыйлықтар таратты. Атап айтқанда сыйға тартылған қысқы сырт киімдер, спорттық формалар, мектеп қажеттіліктері мен ойыншықтарды балалар ризашылықпен қабыл алды.

Президенттік шыршада облыстағы шығармашылық ұжымдар да өнер көрсетіп, балаларға қуаныш сыйлады.