Солтүстік Қазақстан облысында 145 отбасына баспана кілттері табысталды
Тұрғындарды қос мерекемен Солтүстік Қазақстан облысы әкімі Ерік Сұлтанов құттықтады.
«Біздің өңірімізде Өңірлерді дамыту, Қолжетімді баспана 2020, Жұмыспен қамту жол картасы бағдарламалары табысты жүзеге асырылып жатыр. Халықтың баспанаға ие болуы үшін тұрғын үй жинақ жүйесі арқылы мемлекет атынан үлкен қолдау жасалып жатыр. Сіздердің өмірлеріңізде болып жатқан қуанышты, әрі айрықша оқиғамен шын жүректен құттықтаймын!», — деді Ерік Хамзаұлы.
Құрылыстың бас мердігері, «Стройкомпания» ЖШС директоры Хайдар Атажанов бұл үйлер құрылысында жаңа әдістер пайдаланғанын, еденіне қуат үнемдеуші жүйесі қолданылғанын жеткізді. «ҚР Президенті Нұрсұлтан Әбішұлы Назарбаевтың саясатының арқасында жыл сайын жаңа тұрғын үйлер салынып, облысымыздың тұрғындары баспаналы болып жатыр. Мереке құтты болсын!», — деді Хайдар Ватутович.
2012 жылдан бастап «Қазақстанның Тұрғын үй жинақ банкі» бағдарламалары аясында 16 тұрғын үй пайдалануға тапсырылып, 903 отбасы жеке баспанаға ие болды.
