СҚО-да 280 орынға шақталған балабақша ашылды

18 Желтоқсан, 2015 10:09

Қазақстан Республикасының Тәуелсіздігі күні Петропавл қаласында 280 орынға шақталған жаңа «Еркем-ай» балабақшасы ашылды. Мектепке дейінгі білім және тәрбие алу мекемесінің ашылу салтанатына СҚО әкімі Ерік Сұлтанов қатысты, деп хабарлады облыс әкімдігі.

«Үстіміздегі жылы балабақшаларда 1138 орын ашылды. Балаларды мектепке дейінгі біліммен 2017 жылы толықтай қамтамасыз етеміз. Ағымдағы жылы мемлекеттік-жеке меншік әріптестік аясында 4 балабақша салынып жатыр. Олардың бірі 280 орынға шақталған «Еркем-ай» балабақшасы», — деді Ерік Хамзаұлы.

Өңір басшысы солтүстікқазақстандықтарды Тәуелсіздік күнімен құттықтап, «Титан-Север» ЖШС құрылтайшысы, бас мердігер Гарик Бернецянға атқарған қызметі үшін алғысын білдірді.

Гарик Бернецян компания балабақша құрылысымен алғаш рет айналасып жатқанын және бұл жұмысты алдағы уақытта жалғастыратынын атап өтті. 2016 жылы компания тағы да бірнеше балабақша тұрғызуды жоспарлап отыр.

Облыс әкімі атынан балабақшаға микроавтобус кілті табыс етілді.

Жалпы Солтүстік Қазақстан облысында 2015 жылдың қаңтар айынан бастап балабақшаларда 669 орын ашылған, Петропавл қаласы бойынша 326 орын ашылған. Үш жастан алты жасқа дейінгі балалардың 95 пайызы мектепке дейігі тәрбиемен қамтылған.

Сондай-ақ, 16 желтоқсанда Петропавл қаласында «Мадагаскар» отбасы демалысына арналған орталық ашылды. 4,5 мың шаршы метр аумақта аттракциондар, боулинг және дәмхана орналасқан. «Тайга» ЖШС жобасы «Бизнестің жол картасы 2020» бағдарламасы аясында іске қосылды.

Барлық жаңалықтар