Кәсіпкерлер құқығын қорғау кеңестері өңірлердегі жұмысты реттейді – ҰКП

15 Желтоқсан, 2015 17:13

Кәсіпкерлер құқығын қорғау кеңестері өңірлердегі жұмысты реттейді. Бұл туралы Орталық коммуникациялар қызметінде «Еліміздегі кәсіпкерлердің құқықтары мен мүдделерін қорғау» тақырыбында өткен брифинг барысында «Атамекен» ҰКП Кәсіпкерлер құқығын қорғау департаментінің директоры Олег Савеленко мәлімдеді.

«Сапалы бизнесті құқықтық қорғауды қамтамасыз ету үшін елімізде Ұлттық палатаның құқық қорғау жүйесі құрылды. Жүйе әр облыста және Алматы мен Астанада жұмыс істейтін кәсіпкерлердің құқықтарын қорғау жөніндегі кеңестерге негізделген. Бұл кеңестердің жұмыстарын бірінші кезекте өңірлердегі және өңірлік палаталардағы құқық қорғау бөлімдері қамтамасыз етеді. Ал орталықта кәсіпкерлердің құқығын қорғау кеңестерінің жұмысын Ұлттық палатаның құқық қорғау департаменті қамтамасыз етеді», - деді Олег Савеленко.

Оның айтуынша, жалпы екі жылғы жұмыс нәтижесінде кәсіпкерлер құқығын қорғау кеңесінің 26 отырысы мен өңірлік палаталардағы кәсіпкерлер құқығын қорғау кеңестерінің 172 отырысы өтті.

2015 жылы орталық кеңестің 8 отырысы мен өңірлік палаталардағы кеңестердің 102 отырысы өткізілді. Бұл жұмыстарға Бас прокуратураның қосқан үлесі зор.