Елбасы іске қосқан 18 жаңа жоба ҚР экономикасына кем дегенде 270 млрд теңге құяды

11 Желтоқсан, 2015 17:12

Индустриялындыру күні аясында қосылған 18 жоба Қазақстан экономикасына кем дегенде 270 млрд теңге құяды. Бұл туралы жалпыұлттық телекөпір аясында Елбасы Нұрсұлтан Назарбаев мәлімдеді.

«Олар Қазақстанның 8 өнеркәсіп өндірісінде жүзеге асырылды. Әрбір жаңа кәсіпорын жыл сайын орташа есеппен 81 млрд теңгенің өнімін шығарады. Бұл жобалар біздің экономикаға кем дегенде 270 млрд теңге құяды», - деді Мемлекет басшысы.

Ол атап өткендей, іске қосылған өндіріс аясында 3 мың тұрақты жұмыс орны ашылды.

Айта кетейік, Үкімет жылына екі рет телекөпір түрінде индустриялық-инновациялық даму бағдарламасы аясында атқарылған жұмыстарға есеп береді.

2015 жылы индустриаландыру картасы бойынша барлығы 120 жаңа нысан пайдалануға беріліп, 10 мың тұрақты жұмыс орны ашылды. Жалпы, бағдарлама жүзеге асырылған 6 жылда елімізде 890 өндіріс іске қосылды. 85 мың адам тұрақты жұмыс орнымен қамтамасыз етілген. Жобалардың 90 пайыздан астамы жеке бизнестің есебінен жүзеге асты.

Барлық жаңалықтар