Үкімет «БЖК-2020» бағдарламасы бойынша түсетін арыз-шағымдарға көңіл бөлуі тиіс – С. Плотников

7 Қараша, 2013 15:03

Үкімет «Бизнестің жол картасы-2020» бағдарламасын жүзеге асыруға қатысты қоғам мен кәсіпкерлер тарапынан түскен ескертпелер мен шағымдарға барынша назар аударуы қажет, бұл туралы бүгін ОКҚ апта сайынғы брифингінде депутат, Қазақстан Республикасы Парламенті Сенатының Қаржы және бюджет комитетінің мүшесі Сергей Плотников хабарлады.

«Бизнестің жол картасы-2020» біздің еліміздегі кәсіпкерлікті қолдаудың тиімді құралы болуда. Сонымен қатар, өкінішке орай, аталған бағдарламаны жүзеге асыруға қатысты көптеген ескертпелер мен шағымдар да айтылуда. Президент атап өткендей, «БЖК-2020» аясында пайыздық мөлшерлемесін субсидиялау жұмысы бойынша облыстық маңыздағы 43 аудан мен қалада сылбыр жүргізілуде. Бұл жұмыс Батыс Қазақстан облысы, Маңғыстау, Шығыс Қазақстан облысы, Қарағанды облыстарында ақсап тұр. 10 облыстық маңыздағы аудан мен қалада бірде-бір миллион бөлінбеген. Сондықтан мұның бәрі кәсіпекерліктің және экономика секторларының дамуына тұсау болып отыр», - деп мәлім етті депутат.

Оның айтуынша, бірқатар өңірлерде бағдарлама аясында бөлінген қаражат бойынша дефицит байқалады. Өңірлік комиссиялар мақұлдаған 155 жоба бойынша 1,5 млрд теңге көлемінде қаражат тапшы.

«Сондықтан үкімет жылдам қимылдап, қаражат тапшылығы байқалатын өңірлерге және бағдарламаларға қосымша қаржы бөлу керек», - деп мәлімдеді депутат.