Астанада 10 кәсіпорын «Іскер» арнайы сыйлығына ие болды (ФОТО)

11 Желтоқсан, 2015 14:07

Бүгін Астанада ҚР Президентінің «Алтын сапа» сыйлығы, «Қазақстанның үздік тауары» республикалық байқау-көрмесі мен «Парыз-2015» бизнестің әлеуметтік жауапкершілігі байқауының лауреаттарын марапаттау рәсімі өтіп жатыр. Салтанатты шара аясында "Атамекен" Ұлттық кәсіпкерлер палатасы төралқасының төрағасы Тимур Құлыбаев үздік кәсіпкерлерге "Іскер" арнайы сыйлығын табыс етті.

Биылғы жылы "Атамекен" Ұлттық кәсіпкерлер палатасы жаңа «Іскер» арнайы сыйлығын тағайындап отыр. Тауар өндіруші және қызмет көрсетуші компаниялардың арасынан жеңімпаздарды анықтау арқылы отандық тауар өндірушілерге қолдау көрсету, тауарлардың қауіпсіздігін қамтамасыз ету, сондай-ақ кәсіпорындарда халықаралық сапа стандарттарын енгізу байқауды өткізудегі басты мақсат болып табылады.

Сонымен, "Өндірістік мақсаттағы үздік кәсіпорын» аталымында "ASTANA Ютария ltd» өндірістік инновациялық компаниясы (Астана), «РауанНалко» ЖШС (Атырау облысы), "Жанарыс" ЖШС (Маңғыстау облысы), «Стрелец А.В.» жеке кәсіпкерлігі (СҚО) жеңімпаз болып танылды.

"Қызмет көрсету саласындағы үздік кәсіпорын» номинациясында Астана қаласындағы "МЕДИКЕР»ЖШС үздік деп танылды.

«Халық тұтынатын тауарларды шығаратын үздік кәсіпорын" аталымында "Тұңғатарова А.Қ." (ШҚО), «Свет» ЖШС (Павлодар облысы), "Құдайбергенов» ЖШС (ОҚО) алдыңғы қатардан көрінді.

Ал "Үздік азық-түлік тауарлары" аталымында «Мадлен-KZ» ЖШС (ОҚО), "Ақбарс НК» ЖШС (Қостанай облысы) "Іскер" арнайы сыйлығына лайық деп шешілген.

Суретке түсірген Бауыржан Жуасбаев