Түркістанда балабақша пайдалануға берілді
11 Желтоқсан, 2015 13:04
Түркістан қаласы, Жүйнек ауылдық округінде жаңа балабақша бүлдіршіндерге есігін айқара ашты, деп хабарлады облыс әкімдігі.
Сыйымдылығын арттыру мақсатында кәсіпкер жеке қаржысына балабақшаны күрделі жөндеуден өткізіп, жанынан қосымша ғимарат салды.
Аталған орталық заманауи үлгіде жабдықталған. Мекемеде 3 және 6 жас аралығындағы бүлдіршіндер 6 топта тәрбие алады. Айта кетейік, бүгінгі таңда Түркістан қаласы аумағында мектепке дейінгі 54 шағын орталық пен 45 балабақша жұмыс істейді.
Оның ішінде он бесі жекеменшік. Соңғы бес жылдың ішінде Түркістан қаласының білім саласын қаржыландыру 51 пайызға артса, осы жылы 2 мектеп пен 2 балабақшаның құрылысы жүргізіліп, пайдалануға берілді. Тәуелсіздік күні қарсаңында киелі шаһарда 120 орындық жекеменшік балабақша пайдалануға берілмек.
