К.Мәсімов: Бірыңғай жинақтаушы зейнетақы қорындағы қаражатты пайдалану мәселесі талқыланатын болады

«Бұл жыл барлығымыз үшін оңай болған жоқ. Өйткені көптеген экономикалық көрсеткіштерге ықпал ететін жайттар болды. Жақында ғана Мемлекет басшысы Қазақстан халқына Жолдауын арнады. Бұл құжатта Үкімет, кәсіпкерлер қауымдастығы, қоғам алдында тұрған мақсат-міндеттер нақты айқындалды, оларды біз 2016 жылы орындауымыз қажет. Мемлекет басшысының Жолдауын негізге ала отырып, кеше Үкіметтің кеңейтілген отырысын өткіздік», - деген Үкімет басшысы кәсіпкерлер қауымдастығымен бірге нақты іс-әрекет жоспарын дайындау қажеттігін атап өтті.

«Сіздер осы жылы көтерген мәселелердің көпшілігі шешілді. Ақша-кредит саясаты мәселесін сіздер әрбір кездесуде көтердіңіздер, ол бүгінде өз шешімін тапты. Қазіргі уақытта Ұлттық өз ұстанымын жариялады. Бүгінде бірыңғай жинақтаушы зейнетақы қорындағы қаражатты пайдалануға қатысты мәселе маңызды. Бұл сұрақты экономикалық саясат кеңесінде талқылаймыз. Бұл орайда «Атамекен» палатасы, қаржыгерлер қауымдастығының ұстанымы бізді қызықтырады. Бірыңғай жинақтаушы зейнетақы қорындағы қаражаттың мемлекеттің қаржысы еместігіне назар аударғым келеді. Бұл салымшылардың ақшасы. Сондықтан бірінші кезекте біз бірыңғай жинақтаушы зейнетақы қорындағы қаржыны сақтап, оны еселеуді ойластыруымыз керек. Екіншіден, қордағы қаржыны ағымдағы мәселелерді шешудің жолы ретінде қарастыруымыз қажет», - деді К.Мәсімов.