Мемлекеттік хатшы Астанадағы «Дарын» мектебін ашты
Іс-шараға Қазақстан Республикасының Білім және ғылым вице-министрі Е.Иманғалиев, Астана қаласы әкімінің орынбасары Е.Аманшаев, Мәжіліс Парламентінің депутаттары, білім саласы қызметкерлері, мектеп мұғалімдері мен оқушылары қатысты.
Мемлекеттік хатшы құттықтау сөзінде Қазақстан Президенті дарынды балаларды табу мен жетілдіруге, еліміздің бәсекеге қабілетті адами капиталын арттыруға айрықша көңіл бөлетінін атап өтті. Мәселен, Мемлекет басшысының тапсырмасымен 1996 жылдан бастап дарынды балаларға, олардың мүмкіндіктерін жүзеге асыруға қажетті жағдайлар жасалды.
Г.Әбдіқалықова бүгінгі таңда барлық өңірде дарынды балаларға арналған мектептер желісі дамығанын, мамандандырылған білім беру мекемелері қарқынды жұмыс жасап отырғанын атап өтті. Елімізде мамандандырылған 121 білім беру мекемесі табысты жұмыс істейді, оларда жоғары білімді, бәсекеге қабілетті шығармашыл тұлғаны қалыптастыруға барлық жағдай жасалған. Сынақ алаңдарында дарынды балалардың мүмкіндіктерін дамытуға бағытталған түрлі білім бағдарламалары байқаудан өткізілуде.
Мемлекеттік хатшы мамандандырылған мектептердің жетістіктері елдің халықаралық деңгейдегі іс-шараларда алатын орнының көрсеткішін жақсартуға мүмкіндік бергеніне назар аударды. Атап айтқанда, Қазақстан биыл халықаралық пән олимпиадалары бойынша әлемде 15-орынды иеленді.
Мемлекеттік хатшы Г.Әбдіқалықова іс-шара қорытындысы бойынша мемлекеттік органдарға еліміздің мамандандырылған білім мекемелерін одан әрі дамытуға бағытталған бірқатар нақты тапсырма берді.
