Мәжіліс тұтынушылардың құқықтарын қорғау туралы заңға енген өзгерістерді мақұлдады
Заң жобасының негізгі мақсаты тұтынушылардың құқықтарын қорғау саласындағы заңнаманы одан әрі жетілдіру болып отыр. Осыған орай 7 заңнамалық актіге, оның ішінде тұтынушылардың құқықтары мен заңды мүдделерін қорғауды қамтамасыз етуге бағытталған ҚР Әкімшілік құқық бұзушылық туралы кодекс, «Нормативтік құқықтық актілер туралы», «Жарнама туралы», «Сауда қызметін реттеу туралы», «Электр энергетикасы туралы», «Тұрғын үй құрылысына үлестік қатысу туралы», «Тұтынушылардың құқықтарын қорғау туралы» заңдарға өзгерістер мен толықтырулар енгізу көзделген.
«Еуразиялық экономикалық одақ құру туралы шарт тұтынушылардың құқықтарын қорғау саласында мүше мемлекеттердің азаматтары үшін олардың мүдделерін қорғау бойынша тең жағдайлар жасауға бағытталған келісілген саясат жүргізуді көздейді. Жалпы, ұсынылып отырған түзетулер уәкілетті органның құзыретін нығайтып, әлеуметтік жауапты кәсіпкерлік ортаны қалыптастыруға ықпал ететін тұтынушылардың қосымша құқықтық кепілдіктерін қамтамасыз етеді», - деп баяндады ҚР Ұлттық экономика министрі Ерболат Досаев.
Министрдің айтуынша, тұтынушылардың құқықтарын қорғау үшін тауарларды сатуға, қайтаруға және ауыстыруға қойылатын талаптар жетілдірілмек.
«Атап айтқанда, тұтынушының тауардың кемшілігіне қатысты талап қою мерзімдерін белгілеу, тауардың кемшіліктерін жою мерзімдерін нақтылау, сапасыз тауарды ауыстыру тетіктері қарастырылған», - деді Е.Досаев.
Сондай-ақ жұмыстарды орындау, қызметтер көрсету жағдайларын нақтылау, оның ішінде ғимараттарға және құрылыстарға қатысты орындаушының қасақана жасырған кемшіліктері анықталған жағдайда талап қою мерзімін 3-тен 5 жылға дейін ұзарту көзделген. Бұған қоса, тұтынушылардың қоғамдық бірлестіктерінің рөлін күшейту үшін олардың өкілеттіктерін кеңейту жоспарланып отыр.
