ҚР ҰКП Елбасына 2015 жылғы қызметі жайлы баяндады

Кездесу барысында Төралқа төрағасы Т. Құлыбаев пен Басқарма төрағасы А.Мырзахметов Мемлекет басшысына Ұлттық палатаның 2015 жылғы қызметі, сондай-ақ алдағы кезеңге жоспарлары туралы баяндады.

Қазақстан Президенті 2013 жылы құрылған Ұлттық палата осы жылдары үлкен жұмыс атқарғанын атап өтті.

«Атамекен» кәсіпкерлердің мүддесін білдіреді. Палата шағын және орта бизнесті қолдау мақсатында мемлекет тарапынан атқарылған көптеген шараларды жүзеге асыруға қатысты. Бес институционалдық реформа аясында 80-ге жуық заң қабылданды, оларды әзірлеуге Палата өз үлесін қосты. Бүгінде оларды іске асыратын кез келді», - деді Мемлекет басшысы.

Сонымен бірге Нұрсұлтан Назарбаев жекешелендіру үдерісінде отандық бизнестің мүддесін барынша қорғауды, мүлікті жария етуге қатысты түсіндіру жұмыстарын белсенді жүргізуді тапсырды.

Елбасы Қазақстанда өндірілген тауарларды, әсіресе сыртқы нарықтарда ілгері жылжытудың маңыздылығын атап өтті, сондай-ақ инвестиция тарту, ауыл шаруашылығы кооперациясы, жұмыспен қамту және ауылдық аймақтардың тұрғындарын оқыту салаларында «Атамекен» Ұлттық кәсіпкерлер палатасына белсенді жұмыс жүргізу қажет екендігіне тоқталды.   

Өз кезегінде, Палата басшылығы кәсіпкерлерді қолдау орталықтары 188 аудан орталығында, моноқалаларда, шағын қалаларда бар екенін хабарлады. Бүгінде олардың базасында 212 мыңнан астам кәсіпкерге қолдау көрсетілді.  

Ұлттық палата кәсіпкерлікті қолдау арқылы бизнес-ортаны жетілдіруге қатысып жатқаны аталып өтілді.

Ағымдағы жылы 6,9 мыңнан астам нормативті-құқықтық акт, соның ішінде 200-ден астам заң жобасына сараптама жүргізілді.  Кәсіпкерлерден келіп түскен 9,6 мың шағымның  41% оң нәтижеге қол жеткізілді.

Сонымен қатар, сатып алу жүйесін және жергілікті қамтуды дамыту аясында 2014 жылы 1 тамыздан «Атамекен» ҰКП қолдауымен отандық өндірушілермен 334 млрд теңгеден астам қаржының 750 көпмерзімдік шартын жасасты. 

Кездесу қорытындысы бойынша Мемлекет басшысы бірқатар тапсырма жүктеді.