ИИДМБ: Қостанай облысында Индустрияландыру картасы аясында 30 жоба іске қосылды және 109 жұмыс орны ашылды

9 Желтоқсан, 2015 08:37

2015 жылы Қостанай облысында ИИДМБ аясында Индустрияландыру картасының 30 жобасы жүзеге асырылды және 109 жұмыс орны ашылды, деп хабарлады аймақ басшысы Архимед Мұхамбетов облыс активімен кеңес барысында.

Әкім атап өткендей, жалпы жүзеге асыру үшін 46 жоба іріктелініп алынды.

«Біз алдағы үш жылға Дағдарысқа қарсы жоспарды жасақтап, қабылдадық. Біздің солтүстік аймақты дамытуда ауыл шаруашылығына басымдылық берілген», - деді облыс басшысы.

Сонымен қатар, Архимед Мұхамбетов өз сөзінде ет кластерін құру бойынша жаңа облысаралық кооперация жобасына тоқталды. Ол 2016 жылы басталады. Жобаға Қостанай, Ақтөбе және Батыс Қазақстан облыстары бірлесіп атсалысуда. Бұл ретте олар ҚР АШМ-мен меморандумға отырды.

Әкімдіктің мәліметі бойынша аталмыш жоба ауыл шаруашылығының барлық салаларында ІҚМ басын арттыруға септігін тигізеді. Нәтижесінде, жаңа жұмыс орындары құрылады және аймақтың экспорттық әлеуеті артады.

Сонымен қатар, аймақ басшысы келелі кеңесте халыққа Елбасының Жолдауын түсіндіру бойынша жұмыстарды жандандыруды және оны соңына дейін жеткізуді тапсырды.

«Біз әрбір азаматқа осы стратегиялық құжатта көрсетілген ақпаратты жеткізуіміз керек. Бұл бізбен сіздің міндетіміз», - деп түйді Архимед Мұхамбетов.