2016 жылы броньды дөңгелекті машина шығару көзделіп отыр (ФОТО)

8 Желтоқсан, 2015 15:53

Астанада «Қазақстан Парамаунт Инжиниринг» ЖШС-пен бірлесіп броньдалған дөңгелекті машиналар шығаратын зауыт іске қосылды. Жаңа зауыт жылына 120 броньды дөңгелекті машина шығаруды көздеп отыр. Бұл туралы зауыт жұмысымен танысу барысында «Қазақстан Парамаунт Инжиниринг» Бас директоры Ербол Сәлімов мәлімдеді.

«Осындай жоба Орта Азияда алғаш рет жүзеге асырылуда және қорғаныс пен машина құрастыру индустриясында үдемелі жетістікке қол жеткізуді қамтамасыз ететін жоғары табысты бірлескен кәсіпорын құруға мүмкіндік берді. Зауыттың өндірістік қуаты жылына 120 броньды дөңгелекті машина шығаруды көздейді. Өнім Қазақстан үшін жасалады және оны шетелге экспорттауға да мүмкіндік бар», - дейді Ербол Сәлімов.

Оның айтуынша, заманауи жоғары технологиялық тиімді жабдық металл табағын лазермен ашу, броньды табақтарды дәнекерлеу, лак-бояу жабындарын жағу, құрастыру жұмыстары, сапаны қатаң бақылауға алу сияқты бірқатар жұмыс циклін іске асыруға мүмкіндік береді.

Зауыттың техникалық жабдықталуы әскери және азаматтық мақсаттағы дөңгелекті техникаларды өндіруге мүмкіндік береді. Зауытта шығарылатын барлық техника халықаралық стандарттарға сай келеді.

Аталған жоба «Қазақстан инжиниринг» Ұлттық компаниясы» АҚ, «Қазақстан инжиниринг Дистрибьюшн» ЖШС және «Парамаунт групп» (ОАР) компанияларының қатысумен жүзеге асырылады.
Атап өтсек, «Paramount Group» - жаһандық қорғаныс, бітімгершілік күштер мен ішкі қауіпсіздікті қамтамасыз ететін Африкадағы ірі жеке әуе ғарыштық және қорғаныс компаниясы.

Барлық жаңалықтар