«ЖҚЖК 2020» бағдарламасында білікті қызметкерлердің жұмыс орындарын сақтауға баса назар аударылатын болады - ҚР ДСӘДМ
8 Желтоқсан, 2015 13:52
«Жұмыспен қамтудың жол картасы 2020» бағдарламасы енді білікті қызметкерлердің жұмыс орындарын сақтауға баса көңіл бөледі, деп мәлімдеді бүгін ҚР Үкіметі отырысында денсаулық сақтау және әлеуметтік даму министрі Тамара Дүйсенова.
«Жаңа экономикалық жағдайда «Жұмыспен қамтудың жол картасы 2020» бағдарламасының назары білікті қызметкерлердің жұмыс орындарын сақтауға, жұмыстан босатылатын тұлғаларды жұмыспен қамтуға көмектесуге және осы санаттағы азаматтар үшін кәсіби білім ұйымдастыруға аударылады», - деді Т.Дүйсенова.
Сонымен қатар, ведомство басшысы 2016 жылдың 15 ақпанында жергілікті атқарушы органдар өңірлік Кешенді жоспарларды әзірлеп, бекітетінін, онда жұмыстан босатылған азаматтардың, сондай-ақ өзін-өзі жұмыспен қамтыған және жұмыссыздарды жұмыспен қамтуға көмек көрсету қарастырылғанын мәлімдеді. Аталған шаралармен, Т.Дүйсенованың айтуынша, 300 мың адам қамтылады.
