ҚР-ның 7 миллионнан астам азаматы көгілдір отынмен қамтамасыз етілген
7 Желтоқсан, 2015 16:07
Бүгінде Қазақстанның 7 миллионнан астам азаматы көгілдір отынмен қамтамасыз етілген, деп хабарлады ҚР энергетика вице-министрі Мағзум Мырзағалиев ОКҚ-дағы баспасөз конференциясында.
«Соңғы 10 жылда елімізде газдандыру бойынша 130 жоба жүзеге асырылып, 1160 елдімекенге табиғи газ тартылды. Жалпы алғанда еліміздегі 16 аймақтың 9-ы немесе Қазақстанның 7 млн астам азаматы көгілдір отынмен қамтамасыз етілген», - деді М.Мырзағалиев.
Еліміздің газдандыру жұмыстары екі құжатқа сәйкес жүзеге асырылуда. Олар: 2015-2030 жылдарға арналған Қазақстан Республикасын газдандырудың бас сызбасы мен 2030 жылға дейін газ секторын дамыту тұжырымдамасы.
«Бас сызба газдендыру деңгейін бүгінгі 2030 жылға қарай 7 млн-нан 10 млн-ға дейін арттыруға септігін тигізеді. Бұл бүгінгі санға тағы 440 елдімекен қосылатынын білдіреді», - деп атап өтті вице-министр.
Анар Тәңірқұлова
