Павлодар облысының әкімі Мемлекет басшысына жыл аяғына дейін 2 ірі жобаның іске қосылатынын айтты
Қ.Бозымбаев кездесу барысында Мемлекет басшысына өңірдің биылғы 11 айдағы әлеуметтік-экономикалық дамуы мен алдағы кезеңге арналған міндеттері туралы баяндады.
Қазақстан Президенті негізгі мемлекеттік бағдарламаларды сапалы орындаудың, шағын және орта бизнесті, сондай-ақ халықтың әлеуметтік әлсіз топтарын қолдаудың маңыздылығына назар аударды.
Павлодар облысының әкімі бүгінде өңірді дамытудың маңызды факторы Индустрияландыру картасын жүзеге асыру болып отырғанына тоқталып өтті. Атап айтқанда, екінші бесжылдық аясында құны 1,2 триллион теңге мөлшеріндегі 24 индустриялық жобаны іске қосу жоспарланған, оның аясында 6 мың жұмыс орны ашылады.
Қ.Бозымбаев сондай-ақ инвестиция тарту жұмыстары туралы да айтты. Биылғы 10 айда бұл көрсеткіштің өсімі 40 пайызды құраған. Павлодар облысының әкімі сонымен қатар Мемлекет басшысына жыл аяғына дейін іске қосу жоспарланып отырған мұнай коксын қыздыру және агрохимиялық өнім өндірісі жөніндегі екі ірі кәсіпорын туралы баяндады.
Мемлекет басшысы кездесу қорытындысы бойынша бірқатар нақты тапсырма берді.
