• Басты
  • Қоғамдық ұйымдар Шымкенттегі туризмді дамытуды қолдайды

Қоғамдық ұйымдар Шымкенттегі туризмді дамытуды қолдайды

7 Желтоқсан, 2015 15:03
Шымкентте «Оңтүстік Қазақстан облысы мен Шымкент қаласының туристік әлеуетін дамыту» тақырыбына дөңгелек үстел өткізілді. Іс-шара «Шырайлы Шымкент. Жаңаша ойлау – жаңа мүмкіндіктер» ұранымен өтті.

Дөңгелек үстелдің мақсаты – қызығушылық білдірген барлық тараптарды Шымкент пен ОҚО-да туризмді дамыту жолдарын және қалыптасқан үрдісті талқылауға тарту, сондай-ақ қазақстандықтар үшін де, шетелдіктер үшін де өңірдің тартымдылығын арттыру бойынша жаңа идеяларды іздеп табу. Іс-шараны «Қазақстан 2050» жалпыұлттық қозғалысының қолдауымен «Ұлы Дала» азаматтық бастамашыл тобы ұйымдастырды. 

Дөңгелек үстелге танымал қазақстандық өлкетанушы ғалымдар, тарихшылар, өнер және мәдениет қайраткерлері, кәсіпкерлер, сондай-ақ туристік компаниялар, БАҚ, ҮЕҰ мен мемлекеттік органдардың өкілдері қатысты. 

Ағымдағы жылдың 30 қарашасында жыл сайынғы Қазақстан халқына Жолдауын жолдай отыра, Мемлекет басшысы Нұрсұлтан Назарбаев: «...қуат көзін тасымалдаушылар бағасы арзан болып тұрғандықтан, Қазақстан экономикалық өсу тетіктерін өз ішінен іздеу керек»,-деді. Сонымен қатар, Елбасы экономикалық өсудің жаңа аймақтық қозғаушы күштерін қалыптастыру маңыздылығын ерекше айтып өтті. Қоғам белсенділерінің ойынша, Шымкент қаласы мен барша Оңтүстік-Қазақстан облысы үшін осындай қозғаушы күштердің бірі – туризм болмақ. 

Қазіргі таңда, ОҚО-да туризм негізгі екі бағытта дамуда. Бұл, біріншіден, Отырар мен Түркістандағы қасиетті орындар және «Сарыағаш» шипажай аймағы. Шымкент туристік нысан ретінде тиісті бағасына ие болмай отыр. Ағымдағы жылдың  10 айы ішінде Шымкентке Қазақстанның басқа аймақтарынан, алыс, жақын шетелдерден шамамен 18 216, Түркістанға – 900 мың, Сарыағашқа – 70 мың адам демалуға келген.

Дөңгелек үстел қорытындысы бойынша қатысушылар резолюция қабылады. ОҚО-да туристік кластерді дамыту үшін мүмкіншілік жоғары екені баса көрсетілді. Сонымен қатар, ғалымдар мен қоғамдық ұйымдар осы кластердің орталық нүктесі ретінде Шымкент қаласын ұсынып отыр.

Олардың пікірінше, оңтүстік мегаполис туристтер легін облыстың түкпір-түкпірлеріне қарай бағыттайтын жолайрық, тыныстайтын бекет болуы тиіс. Басты міндет – тек туристтерді тарту ғана емес, бірнеше орындарға апару арқылы олардың тұрақтау ұзақтығын ұлғайту. Туризмді дамытуға тамашалайтын бірқатар оңашаланған орындар тұрғысынан емес, кешенді құрылым тұрғысынан қарау керек.

Дөңгелек үстелге қатысқандар Шымкент қаласын 2020 жылға дейін дамыту тұжырымдамасының жобасындағы ережелердің өзектілігін ерекше атап өтті.  Олар жергілікті биліктің инфрақұрылымды жаңғыртуға, қауіпсіз, ақылды қала құруға, бүкіл ОҚО-ның туристік мүмкіндіктер кешеніне айналатын жаңа Шымкент брендін жасап, оны алға тартуға деген ұмтылыстарын құптады.

 

 

Барлық жаңалықтар