ҚТЖ-да теміржолшы жастардың форумы өтуде

«Жастардың республикалық форумы - кадр әлеуетін дамытудың бөлінбес бөлшегі. Форум жастардың кәсіби дамуына, саланы прогресшіл жасампаздармен толықтыруына, шығармашылықпен ойлай алатын жетекшілер жасақтауға  қызмет етеді.  Форум жаңа ойлармен,  тәжірибелер алмасудың алаңы болып қала береді»,-деп атап өтті ҚТЖ әлеуметтік мәселелер жөніндегі департаменттің директоры Қорлан Медиханова.

Атыраулық пойыз диспетчері Бекжан Жиембетовтің айтуынша, жастардың республикалық форумға қатысуы – бұл жастардың біліктілігін көтеріп қана қоймайды. Олардың жаңа достар, пікірлестер тауып араласуына да септігін тигізеді.

Биылғы форумда жастар коммуникациялық Фейсбук, Инстаграм, Жас темір - электронды желілері арқылы да репортаждар алмасады.

Форумда басты тақырыпты талдау барысында көлік жүйесін дамытудың стратегиялық болашағы талданды. Жас теміржолшылар Ұлттық компанияның вице-президенттері, басқарушы директорлары, еншілес кәсіпорындардың бірінші басшылары қатысқан мастер класс, тренингтерде шыңдалады.

Айта кету керек, компанияда Жастар бағдарламасын жүзеге асыру аясында биылғы жылы білім тренингтері мен   байқауларға үш мыңнан астам жас теміржолшы қатысты.  Олардың ішінен «Менеджмент жобасы», «Жас кәсіби маман», «Жастар көзқарасы», «Есте сақтаймыз. Мақтанамыз. Ізбасармыз», «ҚТЖ стар», «Болашақ басқарушылар» байқауларының  жеңімпаздары анықталып, «ҚТЖ» ҰК» АҚ-ның 5-ші Республикалық жастар форумына қатысуға жолдама алды.