«Астана Опера» ҚР Тәуелсіздік күніне мерекелік концерт дайындауда

Театрдың баспасөз қызметінен хабарлағандай, 16 желтоқсанда театрдың Мәрмәр залында опералық сахнажұлдыздары және «Астана Опера» театрының хоры мен симфониялық оркестрі өнер көрсетеді. Концертке маэстро Абзал Мұхитдинов дирижерлік етеді.

Кеш бағдарламасында қазақ және әлемдік музыка классикасының танымал шығармалары: Құрманғазының күйі «Балбырауын», Брусиловскийдің аттас операсынан Қыз Жібектің құрбыларымен бірге орындайтын «Гәкку» сахналық көрінісі, Т.Мұхамеджановтың «Туған жер» атты домбыра мен қобызға арналған дуэті симфониялық оркестрдің сүйемелдеуімен орындалады. Сонымен қатар, Глинканың «Руслан мен Людмила» операсынан Людмиланың каватинасы, Ардитидің «Поцелуй» әні, «Таис» операсынан скрипкаға арналған Массненің Медитациясы және тағы басқа шығармалар паш етіледі.

«Премьералық шығармалардан Вена консерваториясының түлегі Мәдина Исламова орындайтын В.Беллинидің«Монтекки мен Капулетти» операсынан Джульеттаның ариясы және Алмас Серкебаевтің симфониялық оркестрге арналғантүпнұсқадағы «Шалқымасы» ұсынылады. Бұдан басқа, кеште керемет опера әншісі Жұпар Ғабдуллинаның және «Астана Опера» хорының орындауында Дж. Вердидің «Аттила» операсынан Одабелланың ариясын еске аламыз», - деп атап өтті ҚР еңбек сіңірген қайраткері Абзал Мұхитдинов.

Сонымен қатар ол аталған мереке барлық қазақстандықтар үшін өте маңызды оқиға екенін атап өтті. «Тәуелсіздігіміз еліміздің әрбір тұрғынының тағдырынан көрініс тапты деп ойлаймын. Өзімді мысалғаалсам, осы Күннің арқасында және мемлекетіміздің даму тарихындағы жаңа кезеңнің арқасында маған Батыста білім алуға мүмкіндік туды, кеңестік кезеңде бұл туралы тіпті армандамайтынмын. Бұл көптеген үлкен жобаларда өзімді көрсетуге мүмкіндік берді», - деп түйді  маэстро.