Астанада барлық инвесторларға мемлекеттік қызмет көрсететін «Бір терезе» механизмінің тұсаукесері өтті

4 Желтоқсан, 2015 18:49

2015 жылдан бері мемлекеттік көрсетілетін қызметті «Бір терезе» арқылы пилоттық режимде басымдық берілген инвестициялық жобаларды іске асырып жатқан инвесторлар алып келген болатын. «Бір терезе» қағидасы енгізілгелі бері инвесторлармен 200-ден астам кездесу өтті, деп хабарлады ИДМ-нің баспасөз қызметі.

2016 жылдан бастап «Бір терезе» барлық инвесторларға қолжетімді болады. Астанада «Транспорт Тауэрс» ғимаратының 1 қабатында мемлекеттік көрсетілетін қызметті алу бойынша инвесторларға кеңес беретін InvestorServiceCentre құрылды. Инвесторлар «Бір терезе» бойынша 363-тен астам рұқсат пен лицензия алады. Бұл инвесторлар мен мемлекеттік органдар арасындағы тікелей байланысты болдырмау үшін, сондай-ақ, бюрократиялық және әкімшілік кедергілерді азайту үшін жасалып отыр.

2015 жылы 2 желтоқсанда ҚР Инвестициялар және даму министрі Әсет Исекешевтің төрағалығымен Мемлекет басшысының барлық инвесторлар үшін «Бір терезе» қағидасын енгізу бойынша тапсырмасын жүзеге асыру мәселелеріне қатысты кеңес өтті. Онда барлық инвесторларға мемлекеттік қызмет көрсететін «Бір терезе» механизмінің тұсаукесері болды. Инвестиция жөніндегі комитет PricewaterhouseCoopersпен бірге «Бір терезе» қағидасын іске асырудың негізгі элементтерін, оның ішінде Қазақстандағы инвесторлар қызметін ұйымдастырушылық-құқықтық құрылымдау үшін салалық картасын және бизнес-үдерістерін әзірледі.

Қазіргі уақытта инвесторларға қолдау көрсетудің автоматтандырылған жүйесін енгізу бойынша жұмыстар жүріп жатыр. Бұл болашақта online режимде инвесторлардың тіркелуіне, ақпарат алуына, рұқсат құжаттарын алу үшін өтініштер жіберуге мүмкіндік береді.

Барлық жаңалықтар