Астанада «Ұлы Дала Елі» тауар өндірушілердің алғашқы форумы өтуде

4 Желтоқсан, 2015 10:42

Астанада ҚР Ұлттық кәсіпкерлер палатасының бастамасымен «Ұлы Дала Елі» тауар өндірушілердің алғашқы форумы өтуде. Шараға Премьер-Министрдің бірінші орынбасары Бақытжан Сағынтаев қатысуда.

«ДСҰ-ға ену кәсіпкерлік ортаға жаңа мүмкіндіктер сыйлайды, сондай-ақ, бизнес-құрылымдар ұйымдарының жетілуін талап етеді, отандық бизнесті дамыту, қолдау көрсетуді көбету, халықаралық ынтымақтастықты дамыту, өндірістік кооперацияныі жетілдіруді қажет етеді. Осы орайда «Атамекен» ҚР ҰКП тапсырыс берушілер мен сатып алушылар арасында тығыз байланыс орнату үшін жыл сайын форум өткізу шешімін қабылдады», - деп хабарлады ұйымдастырушылар.

Форумды өткізудің мақсаты отандық тауар өндірушілер мен тұтынушылар арасындағы байланыстың жақсаруына жағдай жасау, ынтымақтастық бойынша бизнестің өзекті мәселелерін талқылау.

Аталмыш форумның басты идеясы Елбасы Н.Назарбаев ұсынған «Ұлы Дала Елі» бірыңғай қазақстандық брендті құру болып табылады.

«Қазақстанда өзіне тән жеке белгі болуы керек. Ол әлемдік қауымдастықта ерекшеленіп, өзге елдерден дараланып тұруы қажет», - деді Н.Назарбаев.

Сондай-ақ, форум аясында қазақстандық тауар өндірушілердің көрмесі өтуде, шараға 200 өкіл қатысты.

Ботагөз Айтжанова