Түркіменстан ЭКСПО-2017-ге қатысу туралы келісімге қол қойды (ФОТО)

3 Желтоқсан, 2015 16:47

2015 жылдың 2 желтоқсанында ҚР сыртқы істер министрінің бірінші орынбасары - ЭКСПО-2017 халықаралық мамандандырылған көрмесінің комиссары Рәпіл Жошыбаев Түркіменстанға іс сапармен барды.

Ашхабадта Р.Жошыбаев Саудаөндірістік палатасының төрағасымен, Түркіменстан тарапынан ұлттық секцияның комиссары Довран Оразмурадовпен және Түркіменстанның сыртқы істер министрінің бірінші орынбасары Веп Хаджиевпен кездесті, деп хабарлады ведомстводан.

Түркіменстандық Комиссармен кездесу барысында ЭКСПО-2017 аясында одан ары ынтымақтастық орнату және техникалық мәселелер талқыланды. Р. Жошыбаев атап өткендей, Түркіменстан алғашқылардың бірі болып Астанадағы ЭКСПО-2017 көрмесіне қатысатынын ресми түрде растады. Сонымен қатар ол Түркіменстан павильоны келушілері ең көп алаңға айналатынына сенім білдірді.

Өз кезегінде Д. Оразмурадов қазақстандық тарапқа орталық павильондардың бірін бергені үшін алғыс білдірді.

Кездесу қорытындысы бойынша Түркіменстанның Астанадағы ЭКСПО-2017 халықаралық мамандандырылған көрмесіне қатысуы туралы келісімге қол қойылды.