Қазақстан мен Бразилия депутаттары парламентаралық ынтымақтастықты талқылады

2 Желтоқсан, 2015 17:26

Мәжілістің Халықаралық істер, қорғаныс және қауіпсіздік комитетінің хатшысы Виктор Рогалев бразилиялық парламентшілер Клаудио Кажаду мен Антонио Имбассахимен кездесті, деп хабарлады Мәжілістің баспасөз қызметі.

Бразилия Федеративтік Республикасы Ұлттық Конгрессі Депутаттар Палатасынан келген әріптесіне қазақстандық парламентші жер шалғай болғанымен – көңіл жақын, екі ел арасындығы, оның ішінде парламенттер аралық қатынастардың жоғары деңгейде екендігін атап өтті. Егер Бразилия Қазақстанға еркін визалық тәртіп енгізсе, екі ел арасындағы инвестициялық байланыстарға да жол ашылатын болады.

Тараптар экономикалық өзара ынтымақтастық жолдарын талқылай келе қалпына келетін энергия көздерінің маңызына тоқталды. Соған байланысты меймандар өздерін «Болашақтың энергиясы» тақырыбында өтетін Қазақстан-2017 ЭКСПО көрмесіне шақырғандықтарына ризашылық білдірді.

Мәжілістің комитет хатшысы Бразилияның БҰҰ Қауіпсіздік кеңесіне тұрақты емес мүшелікке және де ДСҰ-на өтуде еліміздің кандидатурасын қолдағаны үшін алғысын білдіріп, 2018 жылы Астанада өтетін әлемдік діндердің VI құрылтайына Бразилияның да қатысуынан үмітті екендіктерін жеткізді.

Қазақстанның бейбіт бастамаларын атай отырып, бразилиялықтар ұлтаралық келісім мен ел іргесін мықты ұстап отырғандықтарын бағалады. Екі жақ депутаттарының ойлары бір жерден шығып, парламентаралық ынтымақтастық арқылы елдер арасындағы қарым-қатынастарды нығайта беретіндіктеріне сенім білдірді.

Барлық жаңалықтар