Түркияда ҚР Тұңғыш Президенті күніне арналған мерекелік концерт өтті (ФОТО)

2 Желтоқсан, 2015 15:34

Танымал қазақстандық скрипкашы Айман Мұсақожаева Анкараның (Түркия) ең үлкен залында өткізген концертін ҚР Тұңғыш Президенті күніне арнағанын айтты. Бұл жайында ҚР Мәдениет және спорт министрлігі мәлімдеді.

Түркияда Қазақ Ұлттық Өнер университетінің гастрольдік сапары басталды. 160 талантты студенттен құралған шығармашылық топты ҚазҰӨУ ректоры Айман Мұсақожаева бастады.

Еуразиялық симфониялық оркестр, «Сырлы саз» фольклор ансамблі, «Шабыт» домбырашылар ансамблі, «Балауса» би тобы, «Айгөлек» скрипкашылар ансамблінің ұжымдары мен басқа да талантты орындаушылар жаңа концерт бағдарламасын дайындады.

1 желтоқсан күні атағы әлемге аян скрипкашы Айман Мұсақожаева өзінің талантты тәлімгерлерімен бірге Тұңғыш Президент күніне арнаған концертін Анкарада өткізді.

Концерт алдында қонақтардың назарына ҚР Президенті Нұрсұлтан Назарбаев жайлы бейнефильм ұсынылды.

Мерекелік концерт бағдарламасы бойынша «Біржан Сара» операсының «Мереке би» биі, атақты «Сарырқа» күйі, «Көзімнің қарасы», «Ақ сиса» сынды қазақ әндері мен «Қазақ вальсі» (Л.Хамиди) сынды халқымыздың інжу-маржандары паш етілді.

Концерт ойдағыдай өтіп, талантты өнерпаздарымыз Анкара жұртшылығының ризашылығына бөленді.

«Тәуелсіз елдің ашық аспаны астында өмір сүріп жатқан біз бақытты ұрпақпыз! Қазақ өнерін барынша сапалы кәсіби деңгейде көрсетуге тырыстық. Өнерімізді сахнадан көрсетіп, өмірде алып жүруге жағдай жасаған Президентімізге айтар алғысымыз шексіз»,- деді Айман Мұсақожаева.

Барлық жаңалықтар