Қ. Жақыпов: ТМД - көптармақты ынтымақтастықтың маңызды саяси алаңы
ТМД ПАА Кеңесі отырысының күн тәртібінде қаралған сұрақтардың бірі – Қазақстанның 2015-жылғы ТМД-ға төрағалығына қатысты болды.
Мәжіліс Спикері біздің еліміздің төрағалығы Қазақстан Президенті Нұрсұлтан Назарбаев бекіткен Тұғырнама негізінде жүзеге асырылғанын атап өтті.
«Тұғырнама мұрагерлік принципіне негізделіп, осыған дейін қабылданған халықаралық келісімдер мен шешімдерді дәйекті жүзеге асыруға бағытталды»,-деді Қ. Жақыпов.
Мәжіліс Төрағасының айтуынша, Қазақстан төрағалығында Достастық шеңберінде өзара түсіністік пен сенімді нығайтуға, сондай-ақ ТМД кеңістігінде қауіпсіздік пен тұрақтылықты қолдауға бағытталған бастамаларға ықпал етуге басымдық берілді.
Қ. Жақыповтың атап өткеніндей, Ұлы Отан Соғысы Жеңісінің 70 жылдық мерейтойына дайындалу және өткізу жөніндегі негізгі іс-шаралар жоспарын жүзеге асыру төрағалықтың маңызды міндеттерінің бірі болды. Осы ретте Мәжіліс Төрағасы:
«Қазақстанның бастамасы бойынша ТМД елдері басшыларынан БҰҰ 70 жылдығына байланысты және халықаралық лаңкестікке қарсы күрес туралы мәлімдемелер қабылданды. ТМД қатысушы-мемлекеттер бейбітшілікті қамтамасыз ету мен қауіпсіздік бағытында БҰҰ рөлі айрықша екенін білдіріп, сонымен бірге, барлық мүдделі мемлекеттер және халықаралық ұйымдармен лаңкестікке қарсы күресте сындарлы іс-қимылға дайын екендіктерін көрсетті»,-деді.
Қабиболла Жақыпов сөзін қорытындылай келе, Қазақстанның төрағалығы барысында өзара іс-қимылдың негізгі бағыттары одан әрі нығая түскеніне, ТМД-ның көпқырлы ынтымақтастықтың маңызды саяси алаңы екені тағы бір мәрте дәлелденгеніне тоқталды.
ТМД ПАА 43-пленарлық отырысы көші-қон, кәсіпкерлік және жергілікті өзін-өзі басқару сынды салаларды қамти отырып, модельдік заңнамаларға қатысты ауқымды мәселелерді талқыға салды.
