• Басты
  • Қазақстанда үш тілді білім берудің жол картасы аясында 2400 педагог оқытылады

Қазақстанда үш тілді білім берудің жол картасы аясында 2400 педагог оқытылады

25 Қараша, 2015 12:59
Қазақстанда үш тілді білім берудің жол картасы аясында 2400 педагог оқытылады .Бұл туралы Орталық коммуникациялар қызметінде өткен баспаcөз мәжілісінде Ы.Алтынсарин атындағы Ұлттық білім академиясының вице-президенті Мұқатова Мәриям мәлімдеді.

«Қазақстанда үш тілді білім берудің жол картасы аясында 2400 педагог оқытылады. 2017-2018 жылдағы оқу жылынан бастап 5 сыныпқа көшкен оқушылар кей пәндерді ағылшын тілінде оқитын болады. Өйткені, 2013 жылы олар бірінші сыныпқа келген кезде ағылшын тілінде білім беру қолға алынған еді. Міне, осылай жоғары сыныптарды ағылшын тілінде оқытуға дайындық басталған болатын. Енді жоғары сыныптарда физика, химия, биология, информатика пәндері ағылшын тілінде өтеді. Сонымен бірге, 5 сыныптан бастап ағылшын тілінде аталған төрт жаратылыстану пәні бойынша терминология оқытылады», - деді ол.

Сондай-ақ, оның айтуынша, тілді үйрету мақсатында «Болашақ» бағдарламасының түлектері шақырылатын болады.

«Біз «Болашақ» бағдарламасымен бітіріп келген педагогика саласының мамандарын да тартпақшымыз. Негізінде, Назарбаев мектептерінің электронды базасындағы методикалық комплексте тіл үйрету курстары, сабақ жоспарлары, пәнге қатысты барлық материалдар үш тілде енгізілген еді. Олар осы бағыт бойынша жұмыс істеп жатыр. Енді бұған еліміздің басқа мектептері де қосылатын болады. Сондай-ақ, 5 сыныптан бастап сананы қалыптастыру үшін де арнайы пән енгізіледі», - деді ол.

Сонымен бірге, жазғы демалыстарда оқушыларға тілдік курстар жүретін болады. Оларды еліміздің тілдерді оқытатын жоғары оқу орындарының студенттері оқытады деді ол.

 

 

Барлық жаңалықтар