Кадрлар жетіспеушілігі мәселесін мемлекеттік-жеке меншік әріптестік шеңберінде шешу керек-Қ.Айтмұхаметов

«Көкшетаудағы кәсіпкерлерге қызмет көрсету орталығында өткен алғашқы жиында облыс басшысы түрлі әлеуметтік жобаларды орындауда жергілікті кәсіпкерлерді әріптестікке шақырды», - делінген хабарламада.

Мысал ретінде облыстың баспасөз қызметі Жақсы ауданындағы «ТНК» агрофирмасы жетекшілігінің мемлекеттік-жеке меншік әріптестігі аясында Есіл балалар үйінің патронажға алуын жоспарлап отырғанын келтіреді.

Мекеменің түлектеріне мамандық игеруге мол мүмкіндік қарастырылып, кәсіпкерлікке қажетті қызметтерге қарай ыңғайластырылмақ. Кейін түлектер сол кәсіпкерлікке тұрақты жұмысқа тұрып, уақыт өте келе баспана да алады. Осылайша бірнеше әлеуметтік мәселе кешенді түрде шешімін таппақ. «Сонымен қатар, облыс әкімі жұмыс отырыстарында кәсіпкерлердің ұсыныстарын қарауға дайын екенін жеткізді. Өңір басшысының қатысуымен өтетін диалогтық алаң маусым сайын өткізілмек», - деп ведомство хабарламасында жазылған.