Еуропалық компаниялар тобы Өскеменде ЖЭС-2 салу туралы ұсыныс білдірді

24 Қараша, 2015 15:19

ШҚО әкімі Даниал Ахметов Германия мен Чехияның жетекші компанияларының басшыларымен кездесу өткізді. Отырыс барысында облыс орталығында салынатын ЖЭС-2 жобасының құрылысына олардың қатысуы мәселесі қаралды, деп хабарлады ШҚО ақпараттық орталығы.

Өскеменде ЖЭС-2 салу қажеттілігі қаланы 2020 жылға дейін жылумен қамту туралы бекітілген кестеде айқын көрсетілген.

Заманауи жоғары технологиямен жабдықталған жаңа ЖЭС құрылысы, жылу күшінің жетіспеушілігін жойып қана қоймай, тұтынушыларды сенімді жылумен қамтып, қала мен оның маңайындағы аудандарды электр қуатымен қамтамасыз ету үшін, қосымша электр қуатын өндіріп шығаруға сеп болмақ. Нысанның күші 300 МВт болады деп жоспарлануда.

Немістің «Global Invest Ltd» инвестициялық компаниясы «E3P Group» (Чехия) және «North Trade Energy» (Германия) энергоқұрылыс компанияларымен бірлесіп замануаи жоғары технологиялық және сенімді еуропалық энергетикалық технологияларды қолдана отырып, жаңа ЖЭС құрылысын инвестициялауға дайын екендіктерін жеткізді. Аталмыш кәсіпорындар Германия, Чехия, Ресей және Пәкістан елдерінде жылу-электр орталықтарын сәтті іске қосқан.

«E3P Group» компаниясының коммерциялық директоры Онджей Штербактың айтуы бойынша олар өз қаржыларына жобаның технико-экономикалық негіздемесін дайындап, жоғары экологиялық стандарттарға сай, түтіксіз мұржалы ЖЭС-2 нысанын 3,5 жылдың ішінде салып бітіруге ниетті.

Өз кезегінде облыс әкімі Даниал Ахметов еуропалық компаниялардың жобаға қатысуы туралы келіссөздер, жобаның технико-экономикалық негіздемесі дайын болған кезде жүргізілетінін басып айтты.

Барлық жаңалықтар