Жезқазған – Бейнеу, Арқалық – Шұбаркөл теміржол желісінде екі мыңнан астам жаңа жұмыс орны ашылды

24 Қараша, 2015 12:19

1200 шақырымға созылатын теміржол инфрақұрылымының ондаған жаңа нысандары Жезқазған – Сексеуіл, Бейнеу – Шалқар учаскілері мен Жезқазған – Бейнеу, Арқалық – Шұбаркөл желілерінде бой көтермек, деп хабарлады ҚТЖ.

Қарағанды, Қостанай, Қызылорда, Ақтөбе мен Маңғыстау облыстарының адам аз тұрақтайтын аумақтарында темір жолдар төселді. Аудандардың шалғайда орналасуы мен инфрақұрылым нысандарының салынбағандығын ескересек, болат магистральдар аймақтарға жаңа дем, жаңа өмір сыйлады.

Жезқазған – Сексеуіл, Бейнеу – Шалқар учаскілерінде 18 бөлім бекеті мен Арқалық – Шұбаркөл желісінде 7 станция пайдалануға берілді. Теміржол инфрақұрылым нысандарында 2153 адамға штаттық жұмыс орны ашылды. Бүгінде 1464 адам қызметке қабылданды.

Қазіргі уақытта Жезқазған электрмен жабдықтау дистанциясы, Қазалы электрмен жабдықтау дистанциясы, Сексеуіл жол дистанциясы, Арқалық жол дистанциясы жасалуда.

Шалқар, Құлсары, Жаңаарқа, Қосмұрын, Қазалы белгі беру және байланыс дистанциясының қызмет көрсету шекарасы кеңеюде.

Естеріңізге сала кетейік, қолданысқа берілген бұл теміржолдар Солтүстік – Оңтүстік, Шығыс - Батыс арасындағы жүкағынын оңтайландырады. Жаңа темір жолдар мемлекетіміздің транзит әлеуетін арттырып қана қоймай, Орталық және Батыс Қазақстанның дамуына, аудандардың экономикалық белсенділігіне өз үлесін қоспақ.

Барлық жаңалықтар