Астанада «Тіл жанашыры» сыйлығының иегерлері мемлекеттік тілдің даму мәселелерін талқылайды

6 Қараша, 2013 09:30

Бүгін Назарбаев орталығында «Тіл жанашыры» сыйлығының салтанатты табысталуына арналған шаралар кешені өтеді, деп хабарлайды орталықтың баспасөз қызметі.

«Түске дейін Назарбаев орталығы мұражайы мен кітапханасы қызметкерлерінің арнайы дайындаған тақырыптық көрмесі өтсе, одан кейін қатысушылар мемлекеттік тілді арнайы семинарларда жаңаша оқыту әдістемесін ортаға салады. Онда модератор ретінде "Назарбаев орталығы" ММ-нің мемлекеттік, қауіпсіздік пен даму мәселесі институтының бас ғылыми қызметкері, филология ғылымдарының кандидаты, доцент Қаныш Бибеков сөйлейді», - делінген хабарламада.

Қазақстанның әр өңірінен Астанаға келіп топтасқан «Тіл жанашыры» сыйлығының иегерлері «Тіл – мемлекеттің негізі» тақырыбында өтетін дөңгелек үстелге де қатысады. Шараның мақсаты- мемлекеттік тілді оқу мен қолдануда қоғамдық пікір қалыптастыру, тіл мәдениетін көтеру болып табылады.

«Тіл жанашыры» сыйлығын табыстау рәсімі 7 қараша күні Қазақстан Республикасының тұңғыш Президентінің мұражайында өтеді.

«Тіл жанашыры» белгісі мемлекеттік тілдің қанат жаюы мен қолдау табуына септігін тигізіп, дамуына үлес қосып жүрген азаматтарға табысталатыны анық.

Сыйлықтың бастамашысы мен ұйымдастырушысы Назарбаев Орталығы, «Тіл жанашыры» ҚҚ мен «Тіл» республикалық ақпараттық-сараптамалық журналы.