Сирия мен Иракта әлемнің 100 мемлекетінен 25 мыңнан астам жауынгер соғысуда – ҚСЗИ КИСИ
23 Қараша, 2015 15:31
Сирия мен Иракта әлемнің 100 мемлекетінен 25 мыңнан 30 мыңға дейін жауынгер соғысуда. Бұл туралы Қазақстанның стратегиялық зерттеулер институтының директоры Ерлан Қарин хабарлады.
«Бүгінде Сирия мен Ирак аумағында әлемнің 100 мемлекетінен 25 мыңнан 30 мыңға дейін жауынгер соғысуда. Осы ретте олардың 7 мыңы 2015 жылдың алғашқы жарты жылдығында келді. Тунис, Сауд Арабия, Иордания және Мароккодан кейін Сирия мен Иракта соғысып жатқан жауынгерлердің басым бөлігі еуропалық елдерден шыққандар», - деді ол.
Оның айтуынша, бұл радикалды идеологияның әлемнің түкпір-түкпіріне тарап кеткенін білдіреді.
«Осы ретте ең көп жауынгерлер Франция, Германия, Ұлыбритания, Бельгия, Швеция сынды еуропалық мемлекеттердің, сонымен қатар Австрия, Нидерланды, Дания, Норвегия, Испания мен Италия елдерінің тумалары», - деп атап өтті ҚСЗИ директоры.
