Мәскеуде Ресей қазақтарының ұлттық-мәдени автономиялары өкілдерінің кездесуі өтті
Елшілікте хабарлағандай, Қазақстан Республикасының Ресей Федерациясындағы Елшілігі ұйымдастырған отырыста Ресейдің аймақтарында қызмет ететін 35-ке жуық РФ қазақтары қоғамдық ұйымдарының өкілдері, Ресейдегі еліміздің консулдық мекемелерінің басшылары және РФ Ұлттар істері жөніндегі федералды агенттігі басшысының өкілдері қатысты.
Кездесу барысында Ресей қазақтары қоғамдық бірлестіктерінің өкілдері өз қызметтері жайлы хабарлап берді. Іс-шара қатысушылары Ресей Федерациясы аумағында тұрып жатқан қандастарымыз арасында қазақ тілін, дәстүрін, мәдениетін сақтау және насихаттау жолында алдағы бірлескен жұмыс жүргізу бағыттарын талқылады.
Жиналыс аяқталған соң Ресейдің елордасында бас қосқан отандастарымыз Қазақстан Елшілігі жәрдемімен Мәскеу қазақтарының қоғамдық ұйымдары және қазақстандық студенттер бірлестігі ұйымдастырған «Алтын күз» байқау-фестиваліне қонақ болып қатысты.
