ҚР Премьер-Министрі К.Мәсімов пен Ауғанстан Президенті М.Ғани екі ел ынтымақтастығының өзекті мәселелерін талқылады
20 Қараша, 2015 19:07
Астанада Қазақстан Республикасының Премьер-Министрі Кәрім Мәсімов Қазақстанға ресми сапармен келген Ауғанстан Ислам Республикасының Президенті Мохаммад Ашраф Ғанимен кездесу өткізді, деп хабарлады ҚР Премьер-Министрінің баспасөз қызметі.
Кездесу барысында тараптар сауда-экономикалық және мәдени-гуманитарлық ынтымақтастықты кеңейтудің өзекті мәселелерін талқылап, өңірлік және халықаралық қауіпсіздіктің негізгі аспектілері бойынша пікір алмасты.
Кәрім Мәсімов пен Мохаммад Ашраф Ғани біздің елдердің арасындағы өзара түсіністік пен сенімнің дәстүрлі ахуалда дамып жатқандығын, ал екі жақты өзара тиімді серіктестік халықаралық аренада ашықтық пен өзара қолдаумен сипатталатынын айтты.
Келіссөздер қорытындысы бойынша К.Мәсімов пен М.Ғанидің қатысуымен бірқатар екі жақты құжаттарға қол қойылды.
