Астанада М.Ғабдулиннің 100 жылдығына арналған ғылыми-тәжірибелік конференция өтуде

«Мәдениет және спорт министрлігі жыл сайын қоғам қайраткерлері мен мәдениет қайраткерлерінің мерейтойларына арналған шаралар өткізеді. Осы жылы біздің ведомство өзге мәдени шаралармен қоса Кеңес Одағының Батыры, көрнекті жазушы,  қоғам қайраткері, әдебиет зерттеуші Мәлік Ғабдуллиннің 100 жылдық мерейтойына арналған шара өткізуде», - деді МСМ Мәдениет және өнер департаменті директорының орынбасары Нұрболат Ахметжанов.

Ғылыми-практикалық конференцияда М.Ғабдуллиннің мұрасын зерттеуші педагог-ғалымдар: Серік Негимов, Қорабаев Серікқазы, Рахымбаев Еркін, сондай-ақ Қазақстанның беделді білім ордаларының ғалымдары мен профессорлары және мерейтой иесінің жақын туыстары Мариям Кенжеахмет, Әбдірова Салтанат қатысып, Мәлік Ғабдуллиннің өмірі мен шығармашылығы туралы баяндамалар жасайды.

Конференция аяқталған соң, елімізге танымал сахна шеберлері  Майра Ілиясова, Серік Ибрагимов және «VoiceKZ» тобының, сондай-ақ танымал театр артистері Жасұлан Ерболат, Мейрам Қайсановтың қатысуымен салтанатты концерт өтеді.

Аталған шара барысында ғылыми-практикалық конференция, кітап көрмесі және салтанатты концерт өткізу жоспарланған.

Сондай-ақ, салтанатты кештің басында М.Ғабдуллиннің өмірі мен қайраткерлігі туралы 10 минуттық деректі бейнефильм көрсетіледі.

Анар Тәңірқұлова