Қазақстан мен Ресей бас прокурорлары қылмыспен күрес саласындағы ынтымақтастықты талқылады

18 Қараша, 2015 20:09

Бүгін Астанада алдағы күндері өтетін ТМД-ның Сыбайлас жемқорлыққа қарсы мемлекетаралық кеңесінің отырысы шеңберінде Қазақстан Республикасының Бас Прокуроры Асхат Дауылбаев Ресей Федерациясының Бас Прокуроры Юрий Чайкамен кездесті, деп хабарлады ведомство.

Асхат Дауылбаев ресейлік әріптесіне келген сапары үшін, сондай-ақ қылмыспен күресудегі жемісті ынтымақтастық, көмек және ықпалдастықтың қалыптасқан дәстүріне, екі елдің қадағалау органдарының қалыптасу тәжірибесімен алмасу және бірлесе талқылау мүмкіндігіне жылы лебізін білдірді.

Кездесу барысында біртұтас экономикалық кеңістік жағдайында қазақстандық және ресейлік прокурорлардың стратегиялық әріптестікті одан әрі арттырудың өзекті мәселелері бойынша пікір алмасу болды. Сұхбаттасушылар атап өткендей, экономикалық интеграция шеңберінде Еуразиялық экономикалық одақ елдерінің құқықтық ынтымақтастығының күшеюі заңдылықты қамтасамыз ету мен халықаралық және аймақтық қауіпсіздікті нығайту бойынша жалпы стратегиялық міндеттерді шешуге бағытталған маңызды шоғырландырушы фактор болып табылады.

Бірлескен жұмыс перспективаларын талқылай келе, тараптар сыбайлас жемқорлыққа, экстремизм мен терроризмге, трансұлттық ұйымдасқан қылмысқа, қылмыстық жолмен табылған ақша қаражатын жылыстатуға, есірткі тасымалдауға, киберқылмысқа қарсы бағытталған ынтымақтастық нысандарын дамытуды және тереңдетуді ұсынды.

Ю. Чайка жылы қабылдау үшін алғысын айта отырып, қалыптасқан сындарлы сұхбатты жалғастыру және дамытуға дайындығын білдірді.