Қазақстанның 2016 жылдағы номиналды ЖІӨ 45 530,5 млрд теңге көлемінде болжануда

18 Қараша, 2015 15:42

2016 жылдағы номиналды ЖІӨ 45 530,5 млрд теңге көлемінде болжануда, деп хабарлады ҚР ұлттық экономика министрі Ерболат Досаев ҚР Парламенті Мәжілісіндегі пленарлы отырыста «2016-2018 жылдарға арналған республикалық бюджет туралы» заң жобасын ұсыну барысында.

Депуттардың назарына 2016-2020 жылдарға арналған еліміздің әлеуметтік-экономикалық дамуының нақтыланған болжамы ұсынылды. Сонымен, еліміздің әлеуметтік-экономикалық дамуының нақтыланған болжамы:

1. 2014 жылдың базасын 982,1 млрд теңгеге арттыру арқылы 2015 жылдың ЖІӨ көлемін түзету;

2. Доллардың есептік бағамын 250-ден 300 теңгеге дейін өзгерту;

3. 2016-2017 жылдары мұнайдың барреллі 40 доллар болған жағдайдағы және 2018-2020 жылдары мұнайдың барреллі 50 доллар болған жағдайдағы әлемдік тауар нарықтарындағы тенденциялар.

Е. Досаев хабарлағандай, 2016 жылдағы бастапқы ЖІӨ 45 530,5 млрд теңге көлемінде болжануда, бұл тамыз айында мақұлданған көрсеткіштен 1 525,3 млрд теңгеге жоғары, 2020 жылы 63 991,5 млрд теңгеге дейін ұлғаятын болады. Жан басына шаққандағы ЖІӨ келесі жылы 8 мың 600 долларға, ал 2020 жылға қарай 11,5 мың доллар дейін өсетіні болжанып отыр.

Индира Кауметова

Барлық жаңалықтар