«Алтын асық» бағдарламасы бойынша 300 өндірушіге 90 мың бас аналық қой сатып алуға қаржы берілді

18 Қараша, 2015 10:34

Жыл басынан бері «Алтын асық» бағдарламасының аясында ауыл шаруашылығы тауар өндірушілері Корпорация қаржысы есебінен 90 мыңнан аса аналық бас қой сатып алды. Аталған бағдарлама қой шаруашылығын дамытуға және ұсақ мал басын асылдандыруға бағытталған, деп хабарлады Аграрлық несие корпорациясы.

«Алтын асық» бағдарламасының мақсаты «Агробизнес-2020» салалық бағдарламасы аясында ауыл шаруашылық тауар өндірушілерін ынтыландыру үшін шағын және орта бизнеске қолдау көрсету болып табылады. Бұдан өзге шаруаларға несие теңгемен және негізгі қарызды өтеу екі жылға дейінгі жеңілдік мерзіммен беріледі. Бұл ретте несие рәсімдеу барысында ешқандай қосымша комиссия алынбайды және несиені өтеудің кестесін ауыл шаруашылық тауар өндірушілері өздеріне ыңғайлы уақытпен белгілей алады.

«Алтын асық» бағдарламасының несиесі арқасында фермерлер еліміздегі қой басын көбейту, қой еті өндірісін арттыру және ата кәсіп қой шаруашылығындағы жүн мен тері секілді шикізат түрлерін де дамытуды қолға алған. Осылайша отандық қой өсірушілер еліміз экономикасының дамуына да өз үлестерін қосып отыр.

Қазақстандағы қой шаруашылығын дамыту үшін «Алтын асық» бағдарламасы бойынша бүгінгі күні 327 ауыл шаруашылық тауар өндірушілеріне жалпы сомасы 2 млрд. 500 млн. теңгеден аса несие берілді. Бұл қаражатқа қазіргі күні 90 мыңнан аса аналық бас қой сатып алынды.

Бұл бағдарлама бойынша, қазірде несие беру көлемі жағынан Жамбыл, Оңтүстік Қазақстан, Алматы және Батыс Қазақстан облыстары көш бастап тұр.